首页 体育内容详情
【Now Sports】皇家马德里一次,两次,三次,喺欧联淘汰赛总比数落后两球时大逆转反胜。除咗皇马战到最后嘅精神外,到底凭咩一次又一次对强队,都可以成功翻盘?
撰文:June有球迷好想知点解、有球迷话系皇家马德里好彩、有球迷问可唔可以写一编关于佢哋嘅心理。咁今日就简单同大家分享少少睇法......

运动心理学家Aidan Moran 喺2012年提出,运动系靠身体配合,而赢波系靠心理。点解咁讲?喺2019年一项有关忍耐力极限嘅研究入面,发现令人停止,唔再努力嘅唔系肌肉疲劳,而系各种心理因素。

所以,系大脑主宰我地嘅身体极限,而唔系身体本身。

正如大家要凌晨5点出去做运动,精神上系需要好大推动力,出到去之后先系用气力。而当球队喺比赛最后几分钟仲落后两球时,仍然可以全队保持高度专注,除咗推动力,气力,亦系最讲求心理坚韧力(mental toughness)。

心理坚韧力(mental toughness)

教练同运动员要意识到心理坚韧力系一种心理结构,佢对于训练同比赛中取得成功系非常关键。简单讲,心理坚韧力有助球员于比赛压力下保持决心、专注同感知控制嘅一致性。

有呢种特质嘅人,佢有绝对相信自己有能力达成目标嘅自信,以及有从挫折中恢复过来嘅能力。

皇马传奇球员基斯坦奴朗拿度绝对系其中一个有超强心理坚韧力嘅球员,但今日想讲皇马现役球员同教练,却奥斯及安察洛堤,以下系一啲例子:

却奥斯(Toni Kroos)
却奥斯咁多年喺唔同嘅访问,或者佢弟弟都讲过,佢喺球场上,大至欧联或世界杯决赛前都唔会紧张;呢个唔系佢嘅个性,主要因为佢知道自己嘅能力,同知道自己可以喺重要时候发挥到最好,亦发现保持平静,喺好多场合都有好大帮助。

「成功经验亦都可以令我安心,佢令你意识到事情唔会再对你产生太大影响。」

「我都知道呢个只系一场足球比赛,有时唔会咁顺利。咁谂会令我觉得平静同放松。但我仍然会保持专注,因为我确实要关注我地嘅比赛情况。」但佢话球场外,佢嘅情绪都会被牵引。所以佢学识咗喺球场上运用佢嘅冷静同心理坚韧力。

安察洛堤
另外,教练安察洛堤亦都有超强心理坚韧力。各种访问入面,佢都表示好相信自己嘅球员同埋知道球队嘅能力,就算大家视皇马为underdog,佢都表示明白但亦已经有对应方案(可以改变战果嘅球员)。

佢喺对曼城赛前访问时表示,知道呢场比赛系一个挑战,但同时系一个机遇。佢亦提出要展现球员嘅个人能力,心态同个性都系重要嘅元素。比赛中,佢极少情绪起伏,无论大落后或者领先,佢都表现出冷静嘅一面。

发布评论